【導盲犬的歷史與知識】

生活 動物 歷史 / 由來 世界

唔知大家出街有冇撞過導盲犬?知唔知係幾時開始有呢?

第一間導盲犬訓練學校,係於第一次世界大戰期間,喺德國設立。由於當時戰爭,令到好多士兵失去視力。德國醫生Dr Gerhard Stalling,希望幫助因為戰爭而失明嘅年老士兵,於是喺1916年8月,喺德國歐登堡設立咗第一間導盲犬訓練學校。佢地每年訓練600隻導盲犬,仲喺德國波恩、漢堡、弗萊堡等地方設立分校,慢慢地擴展到英國、法國、西班牙、美國、加拿大、蘇聯等地方。不過,由於質素下降,學校最後喺1926倒閉。

同時,另一間導盲犬訓練學校喺波茨坦成立。1927年,為瑞士軍隊、警局訓練狗隻嘅美國狗狗飼養員Dorothy Harrison Eustis,因為好奇波茨坦學校嘅訓練內容,喺學校留咗幾個月。後來10月更喺The Saturday Evening Post,發表關於訓練學校嘅文章,引起世界關注。

一位美國失明人士Morris Frank因為聽到Eustis嘅文章,而買咗呢份報紙。佢寫信同Eustis講,希望將導盲犬引入到美國,後來仲話「用5美分買嘅報紙,為我帶嚟一份價值超過一百萬嘅文章」。於是,Eustis就開始訓練狗狗Buddy,同埋帶Morris Frank去瑞士學習點樣同導盲犬合作,而Buddy就成為美國第一隻導盲犬。因為呢個成功嘅經驗,喺1928年,Eustis決定喺瑞士成立名為Seeing Eye School嘅導盲犬訓練學校。1929年,仲喺美國新澤西州成立左同名嘅學校添!

去到1930年,兩個英國女人,Muriel Crooke同Rosamund Bond,因為聽聞由Eustis成立嘅Seeing Eye School呢間學校,決定聯絡Eustis,希望可以畀一個訓練員佢地幫手訓練。到1931年,4隻英國嘅導盲犬亦都完成訓練,仲喺1934年成立導盲犬協會 (The Guide Dogs for the Blind Association)。

至於喺亞洲方面,日本喺1947年有第一隻導盲犬,亦成為亞洲最早有導盲犬嘅國家。自此之後,世界各地都開始有導盲犬同導盲犬訓練學校啦!

至於目前香港導盲犬嘅訓練,一般會喺出生後45日開始居住寄養家庭,大約1歲時,就會接受6至9個月嘅訓練。考試合格後會安排同申請人相配。成功相配後,會工作約8至10年,退休後通常會喺主人或者幼犬時嘅寄養家庭度過架。

了解咗導盲犬嘅歷史同知識,下次見到導盲犬亦要留意「三不一問」,即係不干擾、不餵食、不拒絕 (進入公共場所) ,而且想認識導盲犬時先主動詢問視障人士啊!

資料來源:International Guide Dog Federation、香港導盲犬服務中心

分享


你可能感興趣: