【歷史悠久的綠帽】

生活 歷史 / 由來

問男人最怕咩色,唔洗問一定係綠色。但點解叫唔叫紅帽,唔叫黃帽,一定要叫綠帽?

話說綠帽呢樣野源遠流長,綠色喺中國古代被視為低賤者嘅用色。例如唐朝顏師古同李白曾分別喺作品中形容:「綠幘,賤人之服也。」、「綠幘誰家子,賣珠輕薄兒」,以綠色形容低下階層,可見綠色並唔係一種高貴嘅顏色。

元朝嘅時候,根據「元典章」記載,元朝規定娼妓嘅屋企人同男性親屬要包青色頭巾。明朝時朱元璋亦規定教坊嘅樂人同伶人要戴青巾,樂人、伶人嘅妻子通常都係樂妓,雖然以賣藝為主,但亦會同皇室﹑貴族發生關係,進一步加深綠色嘅代表性。

時至清末,文學家易順鼎喺「王之春賦」以詩句「帽兒改綠,頂子飛紅」,描繪當時官場性賄賂文化,於是「綠帽」就成為老婆同人通姦嘅代稱,用法亦流傳至今。

各個地方,都對於通姦有唔同嘅描述,例如英文會將同老婆通姦嘅男人叫做「Cuckold」,源於以前對杜鵑科鳥嘅稱呼「cocu」,因為雌性杜鵑鳥會喺其他鳥巢生自己嘅蛋,令其他雀仔幫人養大個仔,都形容得幾貼切,意味深重。

點都好,對感情都係專一啲好,否則他朝君體也相同呀!

分享


你可能感興趣: