【非洲的四個語系】

生活 世界

非洲,係「世界古人類」同「古文明」嘅發原地之一。最古老嘅人類化石,就係喺非洲被發現,所以亦有人認為,全世界嘅人,都係由非洲人演變而成。作為世界面積第二大洲,非洲人口約佔全球總人口15%,咁多人﹑咁多唔同種族,究竟非洲有講幾多種語言?不如了解下「我地嘅國家」呀!

要了解非洲語言,首先要了解語系(或稱:「語言系屬分類」)。語系 – 會根據語音、詞彙、語法規則之間嘅對應關係,將相似嘅語言,歸於同一類語群,呢種語群會稱為「同族語言」,亦即係「語族」。現今全世界現存嘅語言約有6900種,根據語系,可以將語言分為多個唔同嘅語群,每個語群中嘅語言,可以反映語言分化同進化,同一個語群嘅語言,都係由一個祖語(母語言)演變而嚟。

至於係非洲方面,非洲語言主要屬於四個語系:

-亞非語系(舊稱閃含語系):包含240語言嘅語系,有2.85億人使用。主要分佈喺北非、西亞、薩赫爾、索馬利亞半島等地區
-尼羅-撒哈拉語系:包含100多種語言,3000萬人使用。主要分佈喺乍得、埃塞俄比亞、肯雅、蘇丹、烏干達、坦桑尼亞北部等地區
-尼日爾-剛果語系:非洲最大嘅語系,包含數百多語種,分佈喺撒哈拉以南非洲地區
-科依桑語系:包含50種語言,12萬人使用,集中喺非洲南部

從上文見到,喺非洲主要嘅四種語系,已經包含幾百種語言,所以好多非洲人,基本上都會識3種或以上嘅語言。同時,非洲擁有多個種族,多到無單一種人口,佔多過非洲總人口嘅8%,所以,非洲亦成為七大洲入面,最大種族差異嘅洲。

分享


你可能感興趣: