【健康冷知識】如何選擇太陽油

生活百科 醫藥健康

夏天又到啦,唔想曬傷皮膚就緊係要搽防曬。不過防曬其實都有好多標準,應該點去分呢?

要揀太陽油,可以從「SPF」同「PA」入手。

SPF,即係Sun Protection Factor 日光保護系數,用作防 UVB 中波紫外線,避免皮膚曬傷、紅腫、疼痛,產生水泡嘅問題。SPF係國際標準,指喺一段情況下可以延長避免曬傷嘅時間,通常包括「SPF15」至「SPF50+」。記住,係延長曬傷嘅時間,唔係阻擋紫外線效果啊!

咁點樣睇要用咩數字?就係將SPF乘以10分鐘,例如用SPF15,本來會喺10分鐘出現明顯曬傷嘅情況,會延長至150分鐘先出現。SPF15適合長時間喺室內,SPF30適合一般外出,而SPF45至50就適合可能會暴曬嘅時候,例如去戶外活動、沙灘等等。

至於PA,即係Protection Factor UVA 防曬系數,用作防 UVA 長波紫外線,避免皮膚變黑、老化鬆馳、色斑、皺紋嘅問題。而PA暫時係無國際標準定義,歐洲會以星號做指數,而亞洲區普遍就係用加號,通常包括「PA+」至「PA++++」。一般為加號愈多,防UVA功效愈好。

另外,天文台亦建議,喺出汗同游水後塗上太陽油。下次出去,唔想曬傷皮膚就要識揀啦!
——————
◆ 更多由天文台提供的防曬資訊:http://www.weather.gov.hk/wxinfo/uvindex/chinese/cuvprotect.htm#Protection
◆ 資料來源:UCSF. School of Medicine、香港天文台、World Health Organization

分享


你可能感興趣: